المر ضحك الحزانى

 

 

المر ضحك الحزانى

واليأس لما الطير بيرفض الرقاد

لاجل الولاد ما تنشق الريح الهوان

والقهر لما ا نتى بترفضى00

وانتى صبية صغيرة تقرى الكتاب

وتقصى إيدى وهيا جاية في الطريق

وتحكمى على النصيحة بالخرس

يا هل ترى

الرفض راجع لحفظك الدرس الجديد

إن الحديد لما أتنصب بالأمر ع الخلق تجره

ويبقى ممنوع م الكلام أي ناسخ يرفعه

وان الخريطة اتصححت

واللا أنا باشطح كتير عن السبب الجوهري

لما نسيت بان أصل ولى أمرك عسكري؟

*ملحوظة0 مش عارف ليه وأنا بانطق آخر كلمة اتقالت، الواد

الصايع جوا يا بيموت م الضحك*

النجوم في العيون اتغيرت

حتى عرايض الاتهام بتتقرى من جوه أعشاش العناكب

الناطقة بالعهد الجديد

ويلفوا بالبق الحديد

كل من عاشر زمان متهم

واللي يحب الريح حيركب

واللي يخشاها يوطى

ويعلن البق الحديد بأنه

من دخل الحزب آمن

من غمض عينه عن أمه المغصوبة   آمن

أما من فتح عينه وطالب أمه تبقى لطيفة

فحتجرى المية في إديه0

وانتى ولا عمرك مرة سمعتي قصيدتي

تستني البوق لما يخبط على سور القصر

وتغافلي عيوني الحراس

وتاخدى كتاب الجغرافيا وتذاكري

ويخش ولى الأمر ويغضب

لما يعرف إن كتابك طبعة قديمة0

بتعايرينى بفقري

وان البيرق لف في كل الدنيا لاجل ما يسقط ديني

واني قليل الأصل

مارفعتش صورة البيرق فوق راسي

واني لسه باحفظ في الدرس المنسي

وان القاضي في الأيام دي لازم يحكم على متولي بالاعدام0

والريح قالعه لي هد ومها مستنية إشارة إيدك

واكتم في الصدر الدمعة الغضبانة

واجري بروحي

وازرع كلمة فوق الحرف النادي عليا

وأنا عامل نفسي مش سامع

غرقت روحي بريء الدم ؛قصيدة الطوب

والأيد اللي اتمدت بتشق التوب اللي خانقها

وبتعلن

إن لسه الأرض المغصوبة وأرضى أخوات

تتنرفز روحي وتصبح طوبة في كف الطفل

وأفوق

أفوق لأني حسب الموجود؛ روحي حتبقى أسيرة هناك

لو رجعت روحي لجسمي حتما حسب الأمر الصادر

م البيه الأبيض حتواجه حكمك بالاعدام0