حمار ...وترابيزة .... وصوت

تأليف مجدي الحمزاوى



صوت من الخارج
(مكبر صوت) -0 تنبيه هام0 على جميع أعضاء فرقة التمثيل الصعود حالا إلى خشبة المسرح0
وذلك كي يستلموا أدوارهم الجديدة0ومن الفضل الأفضل للسادة الضيوف المتواجدين
بالصالة المغادرة حالا0 حرصا على سلامتهم وسلامة النظام العام0 ومن تســــــول
نفسه أن يطل متواجدا فعليه أن يعرف أنه ممنوع منعا باتا صدور أي صــــــــــــوت
كالتصفيق أو الصفير0أو الضحك0كما أنه يحذر عليهم المغادرة قبل الـــــــــــحصول
على إذن من إدارة المكان0 ونكرر ممنوع عليهم صدور ما ينم عن الاستحــــــــسان
أو الاستهجان0لأنه ببساطة شديدة رأيكم لا يهمنا 0
تنبيه هام( إعادة الكلام السابق وفى هذه الأثناء يتوالى صعود الممثلين إلى خشــــــبة
المسرح مع موسيقى مارش عسكري أو موسيقى من النوع التي تصاحب الاحتفالات
الرسمية لا الشعبية) (
(يكتمل صعود الممثلين إلى خشبة المسرح ولكن في شكل غير منتظم)
الصوت - على جميع الممثلين الوقوف بنظام أو تشكيل طابور0منظركم وحش قدام الـــــــــــعالم
ياغجر0 عذرا000 منظركم سيء أمام الجمهور ياسادة0
ممثل 1 -(يشيح بيده) إيه ةده هو إحنا في مدرسة
ممثل 2 - (يجذب ممثل 1 )يابنى عديها
ممثل 1 - (يجذب نفسه من ممثل 2 ) لا يا عم هو في إيه؟ نقف براحتنا 00نقعد(يأخذ جانبا-)
ممثلون3؟4؟5 - يتجهون إلى ممثل 1) أيوه إحنا معاك 0 إحنا ماحناش في مدرسة
الصوت تنبيه أخير 0 على جميع الممثلين الوقوف صف واحد لاستلام أدوارهم إلا
ممثلين 1 ؛2؛3؛4؛5 - إلا إيه يعنى؟ إيه اللي حايحصل
الصوت - ولا حاجة ياغجر0
(إظلام تام على خشبة المسرح مع صوت لبعض الضرب والصراخ مع صفارات
الإنذار وصوت عربات الشرطة والإسعاف وصيحات القوات الخاصة0 ثم إضاءة
وقد اصطف الممثلون صفا واحدا0وممثل 1؛2؛3؛4؛5 يأخذون وضعية الأسرى
وهم جالسون أيديهم فوق رؤوسهم وبعض عربات الشرطة الصغيرة – عربات لعب
الأطفال – تزرع المكان ذهابا وإيابا مع صفيرها ووميضها)
الصوت - على العناصر المساعدة الإبلاغ بالحالة(ارتفاع صوت الصفير) حسنا 00 على جميع العناصر
إخلاء المكان فورا؛ وعلى جميع الممثلين السمع والطاعة والوقوف صفا واحدا لاستلام أدوارهم
وقد صدر الأمر بالعفو عن القلة المنحرفة والسماح لهم بالعودة إلى الصفوف0
( ممثل 1ح2؛3؛4؛5؛ يقومون وينضمون في ذل وخضوع للصف فى مواجهة صالة المسرح)
الصوت - ممثلين للشمال در (يدور الممثلون في حركة عسكرية0 ويدخل من ناحية اليمين شخص بملابس
رسمية يحمل منضدة صغيرة يضعها أمامهم وينصرف؛يدخل شخص آخر بنفس الملابس يضع
كمية من الأوراق وينصرف)
الصوت - على كل شخص التوجه وأخذ دوره كمما هو مرتب0 لن يسمح بالتبديل في الأدوار0 وسنمنحكم
لحظة تعرفون فيها أدواركم لأن العمل سيسير حالا0
(الممثلون على موسيقى حماسية كل واحد منهم يأخذ مجموعة من الأوراق فينتابه
الذهول والدهشة)
ممثل 6 وهو شيخ في
الستين من عمره - مش معقول أنا حااعمل دور عيل صغير في إبتدائى0
ممثل 7 وهو طفل
في العاشرة - وأنا حااعمل باباك
ممثلة شابة - مش ممكن0 أنا أعمل دور شاب صايع تلفان مدمن؟
ممثل 8 وهو شاب
له عضلات وشارب - وأنا حااعمل دور فتاة لعوب (يضحك)
( ممثل 1؛2؛3؛4؛5 يجلسون وقد وضعوا أيديهم على رؤوسهم وينتابهم الذهول التام0 )
ممثل 2 - (وهو يتجه إلى المجموعة الجالسة) إيه مالكم؟ أداوركم إيه؟
ممثل 3 - أنا ترابيزة
ممثل 4 - الحمد لله إنا مجرد باب
ممثل 5 - وأنا شجرة
ممثل 2 - (لممثل 1)وآنت أخدت دور إيه
ممثل 1 أنا اخدت دور حمار
الجميع - حمار؟!
الممثل - حمار
ممثل 3,4 - لا يق عليك
ممثل 1 - لايمكن0 إزاي اعمل حمار؟ إزاي!؟
الممثل الشاب - وأنا إزاي اعمل دور بنت صايعة؟
الممثل الرجل - وأنا لا يمكن أعمل دور عيل
الصوت - على جميع الممثلين السمع والطاعة وإلا 000000000(صوت عربات البوليس,
وارتعاش الاضاءة0المجموعة كلها تركع على الأرض وترفع يدها في مواجهة الصالة)
المجموعة - لا وحياة أبوك يلاش إلا
الممثل الرجل - (يقوم) أنا عيل
الممثل الشاب - وأنا بنت
ممثل 1 - وأنا حمار
( موسيقى حماسية ويخلى الممثلون خشبة المسرح)
الصوت - المشهد الأول تحت الشجرة
( يدخل القائم بدور الشجرة ويقف في أسفل خشبة المسرح وقد وضع على
رأسه ويديه وجيوبه بعض أوراق الأشجار وتتدلى من رقبته لافتة مكتوب
عليها شجرة)
الفتاة اللعوب تجلس تحت الشجرة
(يدخل الممثل القائم بدور الفتاة ويجلس تحت الشجرة مع زى مناسب)
الشاب يدخل ويبدأ في الحديث مع الفتاة
(تدخل الممثلة القائمة بدور الشاب)
((( من هنا ستبدأ تسمية الشخصيات بما تؤديه لا بما هي عليه في الواقع0 فعندما نقول
فتاة نعنى الممثل القائم بدور الفتاة )))
الشاب - ( تدخل القائمة بدور الشاب وتدور حول القائم بدور الفتاة ولا تنطق)
الصوت - الشاب يبدأ في الحديث مع الفتاة
ممثل من الكواليس - يا ست اتكلمى
الشاب - (للصوت الآتي من الخارج) هو أنا ناقصة لخبطة؟ياسيدى المفروض إني شاب0
فتقوللى ياسيدى اتكلم
ممثل الكواليس - ياسيدى اتكلم
الشاب - (متجها نحو الفتاة) مساء الخير يا عسل
الصوت - برجاء الانتباه إلى أن وقت الحدث صباحا وليس مساءا
الشاب - جاضر0(للفتاة) صباح الخير يا عسل 00 الجو حار النهارده
الفتاة - أيوه حار ومقر ف 00 يا سم (يقوم الممثل بمحاولة أن يكون الفتاة بشكل مبالغ فيه)
الشاب - بس كده يا جميل حالا اخلي لك الجو طراوة000وبعدين إنتى قاعدة في الشمس ليه؟
الفتاة - مزاجي كده
الشاب - وأنا مش حاقل مزاجك يا جميل؛ لكن برضه مش حاخليك قاعد في الشمس ؛يا شجرة
( ينادى على الممثل القائم بدور الشجرة) يا شجرة يا شجرة تعالى هنا يا شجرة إرمى بضلك
ع الجميل ( يتحرك الممثل القائم بدور الشجرة من ورائهم إلى جانبهم؛ وبخرج ومن جيبه
ورقة مكتوب عليها "ضل"ويعلقها)
الفتاة يوه ! هي الشجرة بتتحرك؟!
الشجرة - أتحرك عشان الجمال والحلاوة يا حلاوة
الفتاة - يوه الشجرة بتتكلم كمان!
الشاب - تتكلم وتغنى وترقص عشان خاطرك يا جميل
الشجرة - يلاش الرقص وحياة أبوك
الشاب -0 ماشى 00 نخليها تغنى ؛ غنى لنا يا شجرة غنوة حلوة على ذوقك
الشجرة - غنوة حلوة 00 حاضر؛ طلعت يامااحلى نورها شمس الشموسة
( أ الممثل القائم بدور الفتاة يبدو عليه الضيق وينادى على الممثلة القائمة بدور الشاب
التي لاتفهم الأمر من مرة واحدة ولكن مرة تتعجب من الإشارة ومرة تقترب خطوة
والممثل الآخر يشير ولا يريد أن ينطق؛ والشجرة مازالت تغنى إلى أن تجلس الفتاة
القائمة بدور الشاب بجوار الممثل القائم بدور الفتاة)
الفتاة - وحياة أبوكى باست خلصينا؛ المفروض إنك توقعيني في حبك
الشاب - يا عم يلاش لخبطة أنت البنت وأنا الولد
الفتاة - ماتزعقيش كده؛ آسف ماتزعقش كده – خلينا نخلص0 آخر المشهد الزفت ده انك تديني ميعاد
نروح السينما وأنا أوافق 0 ياللا هاتى م الآخر0 آسف هات م الآخر
الشاب على رأيك يوه على رأيك00إيه رأيك ياجميل0000د
الفتاة - باست زعقى 00آسف ياسيدى زعق عشان الناس تسمع
الشاب - حاضر00 إيه رأيك يا جميل نروح السينما النها رده؟
الفتاة - حنتفرج على إيه؟
الشاب - نتفرج على فيلم محترم
الفتاة - يوه أنا بتاعة سينما وبتاعة أفلام محترمة؟!
الشاب - أمال أنت بتاع إيه يا جميل؟
الفتاة - بتاع فيديو وأفلام مش محترمة
الصوت - ممنوع الخروج على النص يا0000
الفتاة - إحنا خرجنا على النص في إيه بس؟
الصوت - لا يوجد في النص فيديو—ياللا عيدوا آخر كلمتين وعيشوا الدور يا غجر
اتقمصوا الشخصيات؛عذرا00 تقمصوا الشخصيات ياسادة000 بذمتكم
فيه في الدنيا بنت جسمها جامد كده باست؟(تنظر الممثلة لنفسها)
الممثلة - أيوه يافندم
الصوت - مش إنت أنا باكلم النيلة اللي جنبك
الممثل - (بحركة خنوثة وتلوى مبالغ فيها) تقصدني أنا؟
الصوت -أيوه خليكى في السكة دي
الشاب - أمال إنت بتاع إيه يا جميل؟
الفتاة - بتاع أفلام مش محترمة
(يتأبط الشاب ذراع الفتاة ويخرجان من يمين المسرح ويسحبان وراءيهما الشجرة)
الصوت -لقد تم أداء هذا المشهد بشيء من الرعونة وعدم الإتقان؛ ولذا نحذر أنه لن
- يسمح في المشاهد القادمة بهذه الرعونة 00 يجب أن تشعروا بأدواركم وتعيشونها
جيدا وتنفعلون معها لأن هذه الأدوار ستكون وهى أدواركم في الحياة؛عذرا نقصد
أن تؤدوا هذه الأدوار كما لو كانت هذه هي حياتكم 0والآن المشهد الثاني ؛ الوالد
الوالد والولد الصغير والحمار وعلى الباب والترابيزة أن يكونا على استعداد؛ربما يحدث
تعديل فوري في المشهد ويكون لهما أدوار(القائمون بأدوار الولد والوالد والجمار يتجمعون
في وسط المسرح وينصرف بقية الممثلين الذين يكونون قد بدأوا في التواجد بعد تأدية
الجملة الأولى من كلام الصوت 0)
الصوت - من يمين المسرح يدخل الوالد مصطحبا ابنه الصغير الذي يركب الحمار(المؤدى لدور
الحمار يقف مذهولا وهو يقارن بين حجم الممثل الكبير القائم بدور الولد وحجم
الطفل القائم بدور الوالد ويراعى أن تكون هناك بعض الاكسسوارت مثل الأذن
الطويلة والذيل ولافتة مكتوب عليها حمار)
الحمار - سيادتك تقصد إن الولد الصغير يركب على ضهرى بجد؟
الصوت - الحمار عنده اعتراض؟!
الحمار -لا اعتراض ولا حاجة بس يعنى
الصوت - لا يوجد يعنى
الحمار - (يركع على الأرض ويرفع يده إلى أعلى )إني أتوسل إلى سيادتكم بأن تعيروني
أذانا صاغية
الصوت - ها قد تعلم الحمار الأدب0 قل وأوجز
الحمار - ( في لهجة حماسية)شكرا لسيادتكم؛ وأنا إذ أقول هذا الكلام أقوله لا لمأرب
شخصي – حاشا لله-فأنا لا أقارن أبدا بين حجم هذا الولد وحجم هذا
الوالد؛ولا أتحدث عن المعاناة التي يمكن أن ألاقيها إذا قدر علىّ لا سمح الله
أن أحمل هذا الولد فوق ظهرى00
الصوت - أوجز
الحمار - نحن جميعا جنود سيادتكم ويهمنا أن يكون مظهرنا العام جيدا؛ وحيث أن
هذا العمل الذي نحن بصدد عرضه عرضة لأن يراه الآخرون؛فلا نقبل أبدا
أن يقول من في قلبه مرض أنه في هذا العرض قد انقلبت الأمور؛ويركب الولد
الصغير(ويشير إلى الممثل الكبير القائم بدور الولد)وأن يظل هذا الشيخ
الكبير ماشيا على قدميه(يشير إلى الممثل الصغير)ماذا سيقولون؟! لن
يدركوا الحكمة العظيمة في هذا القرار ولكن سيقولون أن المبادىء والأخلاق
قد انعدمت0 ولذا فإنني أرى أن يركب الوالد ويسير الولد حرصا منا على
سلامة صورتنا العامة أمام الآخرين
الصوت - حسنا 0 سنبحث في الأمر(صوت شريط تسجيل يدور؛بعض الأصوات؛
صرخات نسائية عالية)0 ليس لأن كلامك صحيحا0 ولكن لنثبت أمام
الآخرين حسن نيتنا ؛وان عندنا الحاجات اللي إحنا بنقول عليها0000
سيركب الوالد ويسير الولد من يمين المسرح إلى يسار المسرح؛ حيث يوجد
باب المنزل(يدخل من يسار المسرح الممثل القائم بدور الباب مع تجهيزه
وتعليق اللافتة ووضع مقبض باب على بطنه)0وبقية الدور كما هي في
الأوراق (يخرج الحمار والولد والوالد والباب أوراقا يتصفحونها)
الصوت -والآن هيا إلى العمل
الوالد - هيه هيه أنا حااركب الحمار (للحمار) ياللا وطي عشان أركب
الولد - أرزاق يركب هو وأمشى أنا
الحمار - (للوالد) روق بس ؛ مش إنت عاوزنى أشيلك لغاية الباب؟
الوالد - أيوه
الحمار - حاضر(يحمل الوالد على يديه ويسير به مسرعا إلى حيث يقف
الباب وينزله)أديك وصلت ياسيدى استني لما ييجى ابنك
الصوت - إيه ده يا غجر؟!0فى حمار يشيل بنى آدم 00أنا قلت يركب الحمار0
عذرا0 والحمار يركب على ظهره وليس على يديه م الأول يا غجر
الوالد - (يسحب الحمار من رباط في رقبته من يمين المسرح إلى وسط المسرح
على الموسيقى الحماسية ومن وسط المسرح يأخذ معه القائم معه
بدور الطفل إلى يسار المسرح)
الوالد - ( للحمار) ياللا ياسيدى وطي عشان أركبك
الحمار - يعنى يرضيك كده؟
الولد - استني وأنا حاساعدك تركب الحمار ياوالدى (الولد يرفع الوالد ويضعه
فوق رقبة القائم بدور الحمار )آدى أنت ركبت ياللا نعمل الدور
الصوت - انتظروا التعليمات تقول أن الوالد يركب على ظهر الحمار لا على كتفه
الولد - ماهو راكب اهه يا عم مشيها
الصوت - لا يمكن (أصوات لشرائط تسجيل ويعض صرخات وطرقات)ولكن تسهيلا
للأمر حيث انه من الممكن أن يسير الأمر كما رأى الوالد؛ بنسمح بالتعديلات
اهه ياغجر00ديموقراطية00 ولكن يجب أن ينهق الحمار أولا
الحمار - أنهق لا يمكن
الصوت - ( وقد بدا متضخما كأنه صوت مجموعة)لا حاتنهق يا خويا وإلا
الولد - حاينهق ياسيدى (للحمار) ما تخلصنا ياسيدى ونهق وأنا حااساعدك
الحمار - حاضر أمري لله ( يبدأ في النهيق والسير وهو يحمل الوالد على كتفه من
يسار المسرح إلى يمين المسرح حيث يوجد الباب؛ ومن الحين للآخر القائم
بدور الولد ينهق نهقة أشبه بالشخير على نفس الموسيقى حتى يصلوا إلى
الباب الموجود يسار المسرح)
الباب - مين اللي بيخبط
الوالد - أنا
الباب -أنت مين؟
الوالد - (حائرا)
الولد - إحنا اللي انتم مستنيينهم
الباب - طيب استنوا لما أشوف هم عاو زينكم واللا لأ
الحمار - (للوالد) يا جدع خلى عندك دم وانزل من فوق رقبتي ما خلاص وصلنا
الوالد - عندك حق؛ نزلني يتبنى (الولد يحمل الوالد وينزله من فوق رقبة الحمار )
الباب - أهلا وسهلا 0 اتفضلوا هم مستنيينكم جوه ( في هذه الأثناء يدخل من
1 ( يشير إلى 3 ويشير إلى الولد)
1 - إيه يا بنى اللي مقعدك معانا؛روح العب بره
2 الولد - لا إنا عاوز اقعد مع أبويا
3 4 0 اسمع الكلام وخليك كويس
الولد يمين المسرح أربة من الممثلين حسب الموجود فمن الممكن أن يكونوا رجالا
أو نساء أو خليط0يحملون مقاعد أو مستويات ويجلسون عليها؛ويدخل
من الجانب الأيمن شخصان بالزى العسكري يجملان مقاعد أخرى لجلوس
الولد والوالد ثم ينصرفا؛يلاحظ أن الممثلين الأربعة يقرأ ون من أوراق؛ ويفسح
الباب طريقا ليدخل الولد والوالد والحمار الذين يسيرون في شكل قوس
خارجي من يسار المسرح إلى اليمين حيث المجموعة)
الوالد - مساء الخير
الجميع - (يقفون) يااهلا وسهلا يا مساء النور شرفتم اتفضلوا
3 - الله انتم جايبين معا كم الحمار؟ مش كنتم سيتوه بره
2 - سيبه يقعد في ركن ؛ جايز ينفعنا
4 - وأنت يا زفت يا باب تعالى هنا ورانا ؛جايز حد يحب يروح دورة المية
3 - واللا جايز نطرد حد ح فتبقى قريب مننا(عبارات الترحيب المتبادلة
أثناء تحرك الباب من اليسار إلى وراء المجموعة بحيث يكون ظاهرا
4 - (يشير إلى 2 بالكلام)
5 – (للوالد) كويس إنك حيت عشان نخلص م الموضوع د
الوالد - أنا تحت أمركم
1 1 - ( يشير إلى 3 ثم يشير إلى الولد)
3 -(للولد)إيه يتبنى اللي مقعدك معانا؟ روح العب بره
الولد - ى أنا عاوز اقعد مع أبويا
4 - اسمع الكلام وخليك كويس
الولد - لا أنا حااقعد مع أبويا( يخرج الولد من جيبه قطعة شيكولاتة ويريها للوالد)
خليني معاك يا بابا( يلوح بقطعة الشيكولاتة في وجهه)
الوالد - خليه قاعد معانا ده هادى جدا( يشير بيده يريد أن يأخذ الشيكولاتة)

1 - ( يبدو عليه الضيق )
2؛3 - ماشى000 بس اقعد وماتتكلمش؛ وأنت يا حمار خد لك جنب ( الحمار يذهب لليمين ويجلس )
4 - نبتدى الكلام
الصوت - تبتدوا إيه يا غجر –عذرا – ماذا تبتدئون يا سادة ؟ كما هو واضح في أدواركم لابد أن يخرج الولد
خارجا000 على الباب تنفيذ الأمر حالا ( الباب يتحرك نحو الولد بشكل مرعب وقد أشهر فوهات
مسدسات )
الولد - حاضر0 حاخرج والعب بالكورة 00 حاضر ( يسير الولد والباب وراءه إلى أن يخرج من المنظر
تماما؛ ثم يعود الباب إلى مكانه )
الوالد - أهو الواد خرج 0 إيه الموضوع؟
3 - الموضوع ياسيدى ل ( 4 ) ما تتكلم أنت
4 - أيوه هو الموضوع ل (2) أنا باقول تتكلم أنت أحسن
2 - لا يمكن أتكلم والكبير بتاعنا قاعد00اتفضل يا كبير ( يشير ل 1)
1 - ( تخرج منه بعض الأصوات ويتبين أنه أخرس ؛ ثم يشير إلى الحمار الذي يقف ويتقدم وسط المجموعة
ويرسم دائرة 00ويشير ناحية الباب إشارة لدخول شيء ما)
الصوت - الحمار متفهم جدا لطبيعة المرحلة وعنده رؤية أحسن من رؤيتكم 00ادخلوا ترابيزة الاجتماعات وهى
ستقول لكم ما تودون أن تقولوه ( تدخل ترابيزة الاجتماعات ويرجع الحمار لمكانه والترابيزة وهى داخلة
يتصرف معها المخرج ؛ ولكن يراعى أن يكون في زيها أو ماترتديه إشارات إلى ورق مالي وبلطة ومدفع
وجزء من سوتيان أو ملابس داخلية لامرأة وتقف الترابيزة أمام كل فرد من الأربعة بالجانب الذي يراه
المخرج 0 ومن ثم تبدو على الممثل إمارات الخوف أو الطمع ؛ ثم تستقر في الوسط)
الترابيزة - أول موضوع موضوع الزراعة والدخل القومي والبرنامج التحويلي
1 - ( تخرج منه بعض الأصوات ويشير ل 2 )
2 - أي نعم بصفتك مالك نص أراضى البلد أو إنت اللي متحكم فيها وهى ماشية بأمرك
3 - إحنا بقالنا عشر سنين بنزرع عسلية
4 - والعسلية اللي إحنا بنزرعها بصراحة جودتها مش ولابد
2 - أي نعم 0 العسلية اللي بيزرعها الجيران أحسم من العسلية بتاعتنا وكمان أرخص
3 - والجيران طالبين مننا بدل ما نزرع العسلية 00 نزرع ورق اللف
4 - أيوه لأن عندهم العسلية وعندهم أزمة في ورق اللف
الوالد - طيب00 ما إحنا لو زرعنا ورق اللف وبطلنا زراعة العسلية جايز بعد سنة واللا أتنين يقدروا ينتجوا ورق وماياخدوش الورق من عندنا0 نعمل إيه ؟ ناكل الورق !؟
1 - ( يشير مغتاظا إلى الوالد )
الترابيزة ( تخرج قطعة شيكولاتة وعسلية ولعب أطفال وتعطيهم للوالد الذي ينشغل بهم )
2 - ( للوالد ) كنت بتقول إيه ؟
الوالد - ( مشغولا بما أمامه ) آه كملوا انتم
3 - على بركة الله إذن قررنا
الصوت - لا ماينفعش كده 0 عاو زين الأسلوب الديموقراطي باغجر00 أخد ورد - عذرا – هذا ليس الأسلوب المتبع في النظام ولابد من إرساء قواعد الديموقراطية بأخذ الأصوات
3 - أظن إن نظرية الوالد معقولة برضه؟
3 - معقولة إزاي ! إحنا حانمضى معاهدة
4 - أيوه معاهدة طويلة الأمد
2 - ناخد الأصوات 00 اللي مع زراعة الورق بدل العسلية يرفع إيده ( يرفع 3؛4 أيديهم ) اللي معترض يرفع إيده ( يرفع 2 يديه الاثنين )
4 - كده يبقى اتنين لاثنين
الوالد - أظن أنا أقول رأيي
3 - لا رأيك ممكن يكون تحت تأثيرات غير موضوعية لأنك صاحب مصلحة
1 - ( يصدر بعض الأصوات ويشير للحمار )
4 - أيوه ناخد رأى الحمار يا حمار إيه رأيك ( الحمار ينهق ) عال الحمار معانا نزرع ورق ونقلع العسلية
1 - ( يصفق وعليه علامات الرضا ويصدر بعض الأصوات فيصفق الآخرون معه )
الترابيزة - نيجى دلوقت لموضوعنا التانى
2 - أيوه الموضوع التانى مهم جدا 00 هو بيتكلم عن إيه ؟
3 - اصبر دلوقت حاتعرف

( من الخارج يأتي صوت ارتطام وتكسير زجاج )

4 - يا ساتر يا رب فيه إيه ؟
2 - خيانة
3 - اهدوا يا جماعة 000 أنت يا باب أنت إيه اللي حصل بره ؟
الباب - ( وهو يتحرك من مكانه إلى العمق ثم يعود ويقترب من المجموعة ) حادثة صغيرة ؛ الواد وهو
بيلعب بالكورة كسر شباك ولا اتنين
الولد - ( يدخل مفزوعا ويزيح الباب ويتجه للمجموعة ) الحقونى الحقونى
أصوات من الخارج- التار التار التار التار ( على إيقاع مغنى في صورة الهتافات )
يا شباكنا إحنا فداك لا تنسانا ولا ننساك
لهوان ولا تسليم الشباك يرجع سليم
القزاز اللي انكسر بيصرخ فينكم يا بشر
التار التار التار التار
( الجميع يقفون في فزع عند سماع هذه الأصوات والقائم بدور الوالد يحتمي بالحمار
الحمار - لا أنا هنا مانفعكش ؛؛ تعالى يا شجرة ( تدخل الشجرة في أقصى اليسار ويهرع إليها القائم بدور الوالد
ويختبىء وراءها
2 - إيه في إيه؟
3 - إيه الدوشة اللي بره دي
الباب - دول أصحاب القزاز جايين على هنا وبيقولوا الكلام اللي سمعتوه
الوالد - كل الدوشة دي عشان قزاز انكسر؟
الترابيزة - أنا باقول نشوف طلباتهم إيه عشان نخلص اللي ورانا
1 - ( يشير إلى الباب ويصدر بعض الأصوات فيتحرك الباب إلى أقصى يمين المسرح)
الباب - أنا باقول تخلوني أدخل الجماعة اللي بيزعقوا ؛ عشان لو مادخلتهمش حيكسرونى ويدخلوا
الترابيزة - ياسيدى دخلهم نشوف مطالبهم ونخلص
( الباب يأخذ جانبا وتدخل مجموعة من الدمى المتحركة بأشكال مختلفة كما يراها المخرج؛ ولكنها كلها
ذات شكل آدمي ؛ وعند دخول هذه الدمى يتحرك الوالد ناحيتهم ويفرح بهم طبقا لعمر الصغير الحقيقي
ويحاول أن يمد يديه نحوهم )
صوت من الخارج
( صوت الدمى ) - جاي يهجم علينا!
ناوى ع الحرب يا ناس
الترابيزة - ( للوالد ) ارجع مكانك ؛ لا مؤاخذة يا خوانا هو عاوز يتفاهم
أصوات الدمى - القزاز اللي مكسور لازم يرجع تانى بنور
الولد من وراء الحمار- طيب ح أنا حاد فع لكم تمنه مع إني ماكسرتوش؛ ده القزاز بتاعكم هو اللي ساب الشبك وجه خبط
في الكورة وأنا شايلهاا في إيدى
أصوات الدمى - الشرف مالوش تمن مهما بينا الزمن
3 - يعنى نعمل لكم إيه دلوقت ؟ يا تاخدوا تمن القزاز وتهوونا
2 0 يا إما نبعت لكم غيره وخلاص
أصوات الدمى - أبدا أبدا لا بديل ده قزازنا قزاز أصيل
الترابيزة - يا جماعة انتم أهل وجيران ؛ عيب كده
الولد - ( وقد عاد صوته لعمره الطبيعي ) جيران وأهل إيه؟ هيا كلمة ؛ ياتاخدوا تمن القزاز وتمشوا يا إما
أعلى مافى خيلكم اركبوه
الصوت - لا داعي للخروج عن النص
الولد - خروج عن النص إيه يا عم ؟ وبعدين إيه البلاوى اللي بتتحدف علينا دي
الصوت - لا داعي للخروج عن النص وابدءوا في التفاوض معهم حول مطالبهم
الحمار - مفاوضات إيه يا عم ؟ ده الواحد يدوسهم برجليه ويخلص( ثم ينهق ويندفع نحو الدمى )
الصوت - مكانك أنت وهو ( بروجي الفرسان ؛ فلاشات متقطعة ؛ دخول لعب الأطفال من دبابات وعربات حربية
صوت طائرات الهليوكوبتر؛ ثم إضاءة وقد وقع الباب على جانبه والشجرة مالت من الإعياء والولد
وحده في دائرة من الدبابات أو الاضاءات المتقطعة ؛ والباقي واضح عليهم الخوف وأثار ضرب)
الصوت - يا غجر اسمعوا الكلام – عذرا – السمع والطاعة 0 نريد منكم السمع والطاعة وعدم الخروج عن أدواركم0
الترابيزة - ياللا يا جماعة اسمعوا الكلام
1 - ( يشير ناحية الدمى )
2 - اتفضلوايا جماعة ؛؛ إيه طلباتكم
أصوات الدمى - بما إن القزاز اللي انكسر مافيش زيه أبدا لأنه قزاز تاريخي وكمان هو اللي حامينا من الحر والبرد
بالإضافة إلى انع مكتوب عليه معظم تاريخنا ؛ وببساطة لا إحنا ولا انتم نعرف نرجعه تانى فإحنا قررناا
إننا نطلب
3 - بس والنبي خلوا طلباتكم حاجة نقدر عليها
أصوات الدمى - تقدروا أو ماتقدروش ! إحنا بنعبر عن رأى الجماهير
4 - ماشى يا عم ؛ إيه طلباتكم ؟
صوت الدمى - إحنا قررتا إننا نطلب منكم تعويض اتنين كيلو عسلية ( النبرة كنبرة البيانات الهامة وفى الخلفية تصفيق
وصفير وهتاف )
الحمار - ( ينهق نهقة كبيرة أشبه بالشخير )
الجميع - بتقولوا إيه؟ مش ممكن ؟!!
صوت الدمى - ( مقاطعا ) لا يمكن ؛؛ دي مطالبنا مش ممكن نتنازل عنها ( هتاف ) مهما طال بينا الزمن
حقنا لازم يعود
3؛2 - يااخوانا لازمان حيطول ولابتاع 0 طلباتكم أوامر 0
4 - يا باب روح إديهم مطالبهم
( الباب يتحرك لليسار ويزيح الدمى أو تخرج معه بمصاحبة أغنية من أغنيات النصر وموسيقى
حماسية ؛ ويعود الجميع إلى الوضع الذي كانو عليه قبل الحادثة )
الترابيزة - نرجع للموضوع التانى المهم
2 - أيوه 000 لازم و نخلص شغلنا
الصوت - استني يا نيلة أنت وهو – عذرا 0 انتظروا قليلا يا سادة ( يبعد الصوت قليلا ) اقطع الإرسال الخارجي
دلوقت ؛ عاوز اكلم الغجر دول كلمتين من غير ماحد يسمع
صوت آخر شبيه - والضيوف اللي قاعدة تتفرج
الصوت - ماانا قلت من الأول يمشوا 0 اقفلوا ودن كل واحد منهم بسرعة عشان ومايسمعوش( تنير الصالة
وأصوات ضوضاء من السماعات الموجودة في آخر صالة المسرح فقط)
الصوت الآخر - دقيقة واحدة وننفذ المطلوب
الصوت - وأنا لسه حاستنى دقيقة 0 خلاص ؛ عموما الناس اللي موجودة في الصالة دي ناس مالها ش لازمة ؛
يسمعوا أو مايسمعوش مايهمش0 أنت يا نيلة أنت وهو اللي على خشبة الزفت ؛ مافيش مرة تعملوا حاجة صح من نفسكم ؛ كل حاجة إحنا اللي لازم نقول عليها ؟! داو شينا بقالكم مدة إن انتم لازم يبقى لكم رأى ؟ وقال إيه كمان يا غجر ؟! مش عاجبكم الأدوار اللي إحنا مديينهالكم !مع إنكم بتعملوها أحسم من الأدوار اللي كنتم عاو زينها 000 صح واللا لا ؟؟ صح واللا لا
الجميع - صح سعادتك ( الحمار ينهق بصوت عالي والجميع ينظر للصالة )
الصوت - والله عال ! أعلى مافيكم صوت الحمار ! صح واللا لأ ؟
الجميع - ( بصوت عالي يطغى على صوت الحمار ) صح
الصوت - ولما هو صح يا جبنا مابتعملوش المفروض إنكم تعملوه ليه؟ لازم كل حاجة أقول لكم عليها !خلاص نسيتوا الأصول ؟ فين أخلاق القرية يا غجر ؟
الحمار - ( ينهق )
الصوت - أنا أقول لك نسيتوا إيه ؛ نسيتوا الثواب والعقاب ؛ أنت يا راجل يا كبير ؛ أنت يا راجل يا محترم ( يحاول الممثل
الكبير القائم بدور الولد أن يتقدم )
الصوت - مش عاوز غلط واللا أخليها ضلمة على دماغكم
( الممثل الكبير يدفع الولد القائم بدور الأب إلى الأمام) أنت ياسيدى إزاي تعدى الموضوع ببساطة كده؟
الوالد - موضوع إيه
الصوت - وكمان مش عارف موضوع إيه !؟ ياخرابى ؛ إحنا نشوف لنا ناس غيركم أحسن ؛ يا ناس يا غجر ياللى
مش عارفين تسمعوا الكلام 0 اسمع يا زفت الولد ده مش كسر قزاز الجيران؟
الوالد - ( بخوف ) ماحنا خلاص ادينهاهم اتنين كيلو ونص عسلية وهم مشوا مبسوطين
3 - وعلى فكرة ؛ عسلية قديمة ومضروبة كمان
الصوت - يافرحتى ببك ياسيدى ! الواد مش لازم يتأدب ع اللي عمله عشان مايعملوش تانى ويا خد باله ؟
الوالد - اعمل له إيه 00000 حاضر ازعق له
الصوت - نزعق له إيه يا عمر 000 ده لازم ينضرب ؛ يتمد ؛ يتعبط؛ ياخد فوق دماغه عشان يكبر ويتحمل
المسئولية ؛ دي أمانة بنسلمها من جيل لجيل --- إحنا لما كنا صغيرين ياما حصل فينا ( بعض رنات
الأجراس والأصوات المتداخلة ) أيوه دي أمانة بنسلمها من جيل لجيل ؛ قبل ما تتكلموا أدبوا الولد000
الأب لزم يضرب الواد – وانتم كمان تساعدوه ؛ ما انتم أعمامه وأخواله يا غجر ؛ ياللا ابتدوا
0 القائم بدور الولد يقف مذعورا وقد التف حوله الجميع ماعدا الحمار الذي أخذ ركنا ؛ والشجرة والباب
في أماكنهم السابقة )
الصوت - الواد لازم يتمد على رجليه ( ينقض 1؛2؛3 على الولد ويجلسونه ويخلعون حذائه ؛4 يذهب للشجرة ويلتقط
منها عصا ويعطيها للوالد )
الصوت 0 ياللا اضرب ( الوالد يضرب الولد ويعلو الصراخ
الولد - حرام عليكم ؛ إيه الظلم ده
الصوت - ده مش عاجبه ؛ اديله على دماغه بالكرسي
الوالد - ( يلتفت ) مافيش كرسي
الصوت - مطلوب كرسي حالا ( يدخل أحد الأشخاص بالزى الرسمي ويحمل كرسيا يناوله للوالد )
الصوت 0 ياللا اضرب
الوالد - ( يضرب الولد )
الصوت - كمان
الوالد - ( يضرب )
الصوت - كمان
الوالد -( يضرب بحالة عصبية)
الولد - إيه الظلم ده ربنا ياخد كم
الصوت = قلعه القميص واهريه على ضهره لحد ما يتعلم الأدب وعلى الجميع المعاونة (2؛3؛4 ينهضون الولد
وينزعون عنه القميص ويأخذونه إلى حيث الشجرة ويصلبونه بحيث يكون ظهره مواجها للجمهور)
الصوت 0 ياللا اضرب
الوالد - ( يضرب بعنف ويرتفع صوته بالبكاء وهو يضرب كما يبكى الولد أيضا )
الوالد والولد معا - خلاص حرمت ماعدتش اعمل كده تانى
الصوت - كفاية كده وارجعوا كملوا أدواركم 000 رجع الإرسال الخارجي
الولد - ( يحاول إن يسير ولكنه يتعثر فيقع فيحبو وعليه علامات الإعياء إلى إن يصل بجانب الحمار ويبكى
وينهق الحمار بصورة متبادلة ؛ ويعود الآخرون إلى الوضع الذي كانوا عليه قبل سماع صوت الزجاج )
الترابيزة - ياللا يا جماعة عشان نشوف باقي الأمور اللي حتتكلموا فيها
الوالد - ( مازال يبكى )
الترابيزة - مالك بتعيط ليه ؟
الوالد - (يشير إلى الولد )
2 - صعبان عليه ابنه
3 - ومادام هو صعبان عليك قوى كنت بتضربه كده ليه يا ظالم
1 - ( يزوم محذرا )
4 - ياللا يا جماعة شوفوا اللي وراكم
1 - ( يشير ل 2 )
الترابيزة - ( للوالد ) تسمع ياسيدى إحنا صحيح أهل وقايلين من زمان إن ابنك اللي حيورثك ويا خد منك الأرض
إننا نديه لبنتنا اللي إحنا حنو رثها وناخد منها الأرض كلها
4 - ( مقاطعا ) إيه الكلام ده ( للوالد ) ده بيهزر؛ وهى معقولة حتموت
3 - واللا حنقتلها لاسمح الله
2 - واللا يعنى إن إحنا حنقتلك وابنك يورثك وبعدين نقتل البنت ونورثها إحنا؟!
4 - لا طبعا ؛ ربنا يديهم طولة العمر
الوالد - ( بعد أن يجفف دموعه ) إيه الحكاية خلصوني
3 - الواد مش مدى ريق للبنت خاص
4 - تاخده معاها السينما ويقعدوا في الضلمة
2 - وهو ولا بيتحرك ولابينطق بكلمة
3 - أصول يلاغيها
2 - يغازلها
4 - يقول كلمتين من اللي هم
2 - تصور البنت بعد ما زهقت منه
3 - باسته عشان يتحرك ؛ يحس بالبوسة بتاعتها
2 - يعرف قد إيه هيا بتحبه
4 - وبدال ما يبادلها حب بحب ؟ يديها بالقلم على وشها
3 - بذمتك دي أصول
الوالد - ( يتلعثم )
4 - بذمتك دي أصول
الوالد - ( يخرج بعض الأوراق من جيبه وينظر فيها ثم يشير للحمار الذي يتحرك إليه ويشيران لبعضهما
ثم يشيران إلى الولد فيتحرك اليهما )
2 - الراجل ياسيدى بيسألك بذمتك دي أصول
الوالد - ماانا خايف أقول حاجة غلط؛ الدور اللي معايا خلص ( يشير بالأوراق) مش عارف أقول إيه
الولد - اتصرف ياسيدى ومشيها
الوالد - ( يسير ناحية الصالة إلى حيث مصدر الصوت )
3 - ماهى ياسيدى الأوامر جات إننا نعمل المفروض إننا نعمله
2 - أيوه المشهد اللي فات
الوالد - يعنى ؟
2 - أيوه مشيها ؛ قول اللي على مزاجك
الصوت - اللي على مزاجه إيه يا سادة؟ انتم مابتتعلموش
الوالد - ماانا ماعنديش حاجة أقولها
الصوت - خلاص خلاص بلا نيلة 0 على جميع الممثلين الوقوف صفا واحدا للتفتيش والنظام واستكمال الأوراق
( يقف جميع من على خشبة المسرح صفا واحدا)
الصوت - أنا قلت على جميع الممثلين
الحمار - ( يندفع خارج الكواليس ويدخل بسرعة وهو يدفع بالشاب والفتاة ) ادخلوا ماتودوناش في داهية ؛
ادخلوا في الصف (ينتظم الجميع في الصف ويدخل من يمين المسرح اثنان من أصحاب الأزياء الرسمية
أو الآلات)
الصوت - ممثلين للشمال در ( يدور الممثلون ) والآن واحد واحد يراجع دوره ( يسير الممثلون إلى حيث الآلات
ويقومون باستلام أدوارهم أو أخذ معلومات أو 00000حسبما يراه المخرج ومن يفرغ يأخذ نصف دوره
من أعلى المسرح حيث يعود إلى آخر الصف ؛ ويتم التحرك إلى إن يعود الصف كما كان فتنصرف الآلات أو أصحاب الأزياء الرسمية ؛ كل هذه الحركة مع موسيقى حماسية )
الصوت - خلاص عرفتم الأدوار يا غجر – عذرا – هل وصلتكم أدواركم يا سادة
الجميع - أيوه وصلت
الصوت - على بركة الله؛ نفذوا( يسير الجميع إلى خارج المسرح ماعدا الشاب والفتاة ؛ ونلاحظ انه مازالت الممثلة
تقوم بدور الشاب والممثل يقوم بدور الفتاة؛ تندفع الفتاة يمينا حيث تمسك وبالشجرة وهى خارجة؛ والشاب
يندفع يسارا حيث يمسك بالترابيزة)
الفتاة - على فين د ه أنا حاتركن تحت ضلك
الشاب - ( للترابيزة ) وأنا حاقعد عليكى عشان مافيش كراسي )
الترابيزة 0 بلاش وحياة أبوك حكاية القعاد دي
الشاب - ماشى أنا حاتركن بس ( الشجرة في جانب والباب في جانب بينهما الشاب والفتاة )
الفتاة - عاوز تقول إيه
الشاب - يوه قدام الناس كده! استنى لما يتقفل علينا باب
الفتاة - بسيطة؛ يا باب يا باب ( يتحرك الباب ) اترزع ياسيدى هنا واتقفل عشان المحروس يبقى على راحته
( يقف الباب في أعلى يمين المسرح ويعلق لافتة مغلق )
الفتاة - خلاص ياسيدى بقينا لوحدنا ؛ عاوز تقول إيه ؟
الشاب - ( تغلبها طبيعة الحياء ) أنا باقول يعنى إن الأوامر جاتنى
الفتاة - أوامر!؟
الشاب - قصدي إن بابا قال لي
الفتاة - بابا!! يا بتاع بابا( تذهب الفتاة إلى حيث الشاب وتضع بدعا حول كتفه) بابا برضه أنا عاوزه اسمع منك أنت؛ كلامك أنت
الشاب - ( يزيح يد الفتاة بعد أن يشعر بالخجل الشديد ) ماشى ياستى ؛ حاقول لك آخر الكلام؛ أنا باقول يعنى إن الحكاية
الفتاة - ياسيدى انطق
الشاب - أنا باقول
الفتاة - أيوه جمد قلبك وخش على طول
الشاب - أنا باقول يعنى أنى عاوز اتجوزك
الفتاة - ( تندفع نحو الشاب الذي يوقفها بيده ) أنت تأمر ياحبيبى ؛ دا يوم المنى ( تندفع نحو الشاب وتحاول إن تحتضنه فيفر منها)
الشاب - يا ست انتى بتعملى إيه
الفتاة - ما بلاش كسوف ؛ ما خلاص أتجوزنا
الشاب - لا إحنا لسه ماتجوزناش ؛ لازم آخد موافقة أهلك ؛ وأجيب أبويا ييجى يخطبك ؛ وبعدين نتفق على ميعاد
الفرح ؛ ونجيب المأذون00
الفتاة - أنت بتقول إيه يادلعدى ؟؟!! وأنا حاستنى ده كله ؟ وبعدين على إيه يعنى مأذون ؟ العرفي أحسن ( تخرج
ورقة من جيبها وقلما وتوقع بأسفل الورقة ) العقد معايا جاهز ياحبيبى ( ترمى بالورقة في وجهه ) انت
خلاص بقيت جوزي ؛ حقي 00ياللا تعالى يا جميل
الشاب - آجى؟ آجى فين
الفتاة - ما قلت لك تعالى ( تعدو وراء الشاب الذي يفر منها ويحاول إن يحتمي بالترابيزة)
الترابيزة - لا بلاش كده أحسن باغير ( تتلوى الشجرة في حركات مبالغ فيها وتأخذ نفسها وتتجه إلى حيث الترابيزة
والباب )
الفتاة - خلاص يا حلو مافيش إلا أنا وأنت ( تهجم على الشاب ويحدث بعض التلاحم ويستجمع الشاب نفسه ويركل
الفتاة ويدفع بها بعيدا فتقع )
الفتاة - ( تصرخ بصوت عال من الألم )
2؛3؛4 - ( من الكواليس ) بنتنا حبيبتنا في إيه ؛ افتحي
الفتاة - ( تتأوه )
2؛4 - ( من الكواليس ) عملت فيها إيه يا مجرم؟ افتحي يا بنت
الفتاة - ( تتأوه)
3 - ( من الكواليس ) أنت يا باب يا زفت تعالى هنا عشان نعرف ندخل
2 - ( من الكواليس ) خلى الشجرة تيجى كمان عشان اتشعبط عليها وادخل ( يتجه الباب والشجرة إلى يمين
المسرح ؛ والشاب في حالة ذهول مما يسمع ولكنه يشير للترابيزة التي تندفع بعد إشارته وتقف وراء الباب)
3 من الكواليس - خلاص الباب وصل؟
2 من الكواليس - لكن مش عاوز ينفتح
4 من الكواليس - أنا حانط فوق الشجرة
3 من الكواليس - أنت مش عاوز تنفتح ليه يا باب؟
الباب - الترابيزة ورايا
4 - ( يبدو كمن تسلق شيئا ولا يبين إلا وجهه وجزء من جسده ) خلص أنا حانط على الشجرة
الشجرة - يا خبر! وأنا حاستحمل كل ده ؟! اخلع أحسن ( تتحرك الشجرة ويقع 4 داخلا )
4 0 آه آه يانى ؛ أنا رجلي باين عليها لانكسرت
2؛3 - ( من الخارج ) بلاش دوشة وافتح الباب
4 - ( يقوم وهو يعرج ) تعالى هنا يا ترابيزة يا وحشة ( تتحرك الترابيزة إلى مكانها في أعلى المسرح)
ياللا ادخلوا ( يندفع 1؛2؛3 ويسحبون معهم الوالد ؛ الفتاة مازالت تتأوه؛ والشاب مازال في حالة ذهول
غلبته طبيعته الأنثوية فيضم يده حول جسده كأنه يحاول إن يستر نفسه ؛3 يقذف بالوالد في ركن
ويندفع هو و1 ناحية الشاب بينما يتجه 2؛ 4 إلى الفتاة ؛ والولد يدخل آخر واحد ولازالت عليه أثار الضرب
من المشهد السابق )
2؛ 4 - قولي لنا عمل فيكى إيه المجرم
3 - عملت فيها إيه يا مجرم
1 - ( يشير بإشارات الوعيد )
الوالد - ( يندفع نحو 1 ؛ 3 ويدفعهم بعيدا ويستلم الشاب ) سلامتك يا بنى إيه اللي حصل ؟
الولد - ( وهو منفصل عن المجموعة ) هو ده ابنك هو كمان ؟
1؛2؛3؛4 - ( للفتاة) قوليلينا بس هو عمل إيه وإحنا حانطلع عينه
الولد - أنت ياسى بابا ما ترد عليا؛ ده ابنك هو كمان ؟
الوالد - ( يخرج ورقة ينظر إليها ) أيوه ياسيدى ابني هو كمان ؛ هو الكبير وأنت الصغير
الفتاة - ( تشير للشاب ) المتوحش ده ضربني ووقعنا على الأرض
الشاب - دا هيا اللي كانت هاجمة عليا
2 - خطيبتك وبتهزر معاك
الفتاة - خطيبته إيه يا عمر ؟ أنا خلاص بقيت مراته
الجميع - مراته!!!؟
الفتاة - أيوه خلاص اتجوزته عرفي
2؛3؛4 - ( يزغردون )
1 - ( بعض الأصوات الغير مفهومة ولكنها تعبر عن فرحة )
3 - يا ألف نهار أبيض
4 - ( يتجه للوالد ) خلاص ياسيدى المواضيع اتحلت والبنت أتجوزت الواد
2 - يبقى مافاضلش إلا موضوع الميراث
1 - ( يزوم محذرا )
3 - ( يأخذ 2 جانبا ) يبقى إحنا لازم نحتفل بيهم
الولد - بس انتم نسيتوا حاجة
الجميع - نسينا إيه؟
الولد - ( يشير إلى نفسه ) أخلاق القرية يا000
1 - ( يزوم مقاطعا )
2 - ياسيدى اليوم فرح ؛ خلينا نفرح
الصوت - ( به بعض الحشرجة والضعف) خطأ خطأ خطأ
( في هذه الأثناء يدخل الحمار من يسار المسر ويأخذ جانبا ؛ وينتبه إلى التعيير الذي حدث في الصوت)
الولد - مش قلت لكم
4 - يعنى أنت شايف إيه ؟
الولد - ( يشير للشاب والفتاة ) مش دول دلوقت متجوزين؟
الجميع - نعم
الولد _ ( يشير للشاب والفتاة أيضا ( والست دي لمت جوزها تكلم معا ها صرخت وفرجت عليه الدنيا؟!
2 - إيه الحكاية يعنى ؟
3 - ده دلع
4 - يا داخل بين البصلة ( يلاحظ أنه مازال يعرج من السقطة )
1 - ( يزوم ))
الوالد - ( لا يهتم بالموضوع ويذهب ناحية الشجرة )
الولد - لا ده لازم يأدبها ؛ وبصفتكم أهلها ومايعجبكمش الحال المايل فانتم لازم تساعدوه؛ ( يذهب
إلى الشاب ) وعشان أنت يا جميل تاخد حقك منها ؛ فلازم تكون شديد
2؛3 - أيوه الزوج له احترامه
4 - لازم تتأدب
1 - ( حائرا )
الولد - ( يذهب للشجرة ويأخذ منها عصا يعطيها للشاب ) ياللا خد حقك
2؛3؛4 - ( يسيرون بطريق آلية إلى الفتاة ويأخذانها وهى تقاوم ويصلبانها على الشجرة
الشاب - ( تسير الممثلة القائمة بدور الشاب كالمنومة أو من أخذتها الرغبة في الانتقام وتضرب الممثل القائم
بدور الفتاة )
الصوت - ( بشيء من الضعف) قلعه القميص واهريه على ضهره لحد ما يتعلم الأدب، وعلى الجميع المعاونة)
1،2،3،4 - ( ينزعون ملابس الممثل القائم بدور الفتاة بحيث يصبح ظهره عاريا والممثلة مازالت تضرب )
الترابيزة - يا جماعة عيب تكشفوا جسم واحدة ست ( في هذا الوقت يكون الحمار قد دار حول أركان المسرح
كمن يستطلع الأمور ، ويذهب لأسفل المسرح وينظر ناحية الصالة ثم يتجه إلى يمين أسفل المسرح)
الترابيزة - يا جماعة كفاية كده ونعمل باقي شغلنا ، ماهو مافيش اعتراضات أهو
الفتاة - أيوه كفاية ( الجميع يتركونها ويتجمعون حول الترابيزة ماعدا الفتاة التي تسقط من الاعياءبجوار
الشجرة ، والشاب الذي يأخذ أسفل يسار المسرح ؛ والباب والشجرة والحمار في أماكنهم )
1 - ( يخرج بعض الأوراق وينظر إليها ويشير ل 2 )
2 - أيوه إحنا حانخرج نروح مشوار
4 - أنا رجلي تعبانة مش قادر أمشى
1 - ( ينظر في الأوراق ويشير ل2 الذي يتجاهله ويكلم 4 )
2 - إيه رجلك تعبانة دي 000لازم نعمل أدوارنا وإلا أنت عارف
1 - ( يزوم بقوة ويشير ل 2 بالأوراق )
2 - لا مؤاخذه ( ل 4 ) أنت ماشى صح ، كنت بتقول إيه
4 - رجلي تعبانة ومش حاقدر أمشى
1 - ( يزوم ويشير ل 3 )
3 - ياسيدى مافيش مشكلة ، تركب الحمار 0 يا حمار يا حمار ( الحمار يتجه إليهم في خطى متثاقلة )
الحمار - عاو زين إيه
الجميع - ( لا يردون وفى حالة ذهول من الطريفة التي يتكلم بها الحمار )
الحمار 0 ( بتحد ) نعم عاو زين إيه ؟
الجميع - ( نفس الحالة السابقة )
الحمار - ( ينهق في غضب )
3 - أيوه ياسيدى عاو زين الراجل ده يركبك ، ياللا بلاش عطلة ( الحمار يتركهم ويذهب بعيدا )
2 - تعالى أنت رايح فين ( ويقوم مع الآخرين بالاتجاه إلى الحمار الذي يهرب منهم ويتجه إلى الباقين
ويركلهم ويصفعهم ، وتدور حالة من الهرج ، إلى إن يتمكن الجميع بمساعدة الباب والشجرة من
الحمار في دائرة )
2 - ( للحمار ) أنت حتتركب بالذوق وإلا
الحمار - يا جماعة حراك عليكم ، ده إن كانت الترابيزة مارضتش تستحمل البتاع ده ! أنا حاستحمله وأشيله!؟
3 - دي الأوامر
الحمار - أمر مين ؟
الجميع - ( محذرين ) اسكت ماتوديناش في داهية
الحمار - أوعوا تكونوا فاكرين إن أنا عشان حمار مش عارف الأدوار
4 - طيب ولما أنت عارف ، بتعصلج ليه
الحمار - يا خفيف مكتوب استراحة خمس دقا يق نعمل فيهم اللي على راحتنا
2،3 - ( ينظران في الأوراق ) أيوه الحمار عنده حق ، استراحة
0 يجلس الجميع متشرذمين ويلاحظ إن القائمان بدور الولد والفتاة قد أخذا جانبا بجوار الباب فيتجه
اليهما الحمار)
الحمار - إحنا مش لازم نسكت ع اللي بيحصل ده ؟!
الولد - قصدك 000
الحمار - ( مقاطعا ) يعنى عاجبك اللي بيحصل فينا ده
الفتاة - دي الأوامر
الحمار - ياغبى أنت وهو ، انتم مش ملاحظين إن اللي بيدي الأوامر صوته تعب
الولد والفتاة - بتقول إيه
الحمار - الظاهر إنكم مش واخدين بالكم ، على كل حال أنا عندي فكرة، أنا حاخبط واكسروا قول
أي كلام ، لو سمعتم أوامر قولوا ده حمار في فترة استراحة إيه اللي حيعمله يعنى ! ولو طلع
كلامي صح 00 يبقى نصحح الوضع 0 موافقين ؟
الولد والفتاة - يصمتان
الحمار - ( يتجه إلى الباقين ويضربهم ) كله لازم يسمع كلامي 0انا الكبير هنا 00كله لازم يسمع كلامي
أنا الكبير هنا ( تصدر بعض الشوشرة والحشرجة من مصدر الصوت )
الحمار - و( يتجه إلى الولد والفتاة ( مش قلت لكم مش قلت لكم ؟يا قوم لقد انقضى عهد الظلم،عهد الفوضى والطغيان ، وآن الأوان كي نحتفل ببداية عهد جديد ترفرف فيه الحرية فوق آذاننا وذيولنا ، لقد مضى عهد الظلم وآن الأوان لكي نزرع مستقبلنا بالمشرق بالخضرة والبرسيم ( في هذه الأثناء يكون الكل قد التف حوله عدا الترابيزة ، ويراعى صيحات الاستحسان والتصفيق) يا قوم آن الأوان لكي نصحح
الأوضاع
الجميع حنصحح الأوضاع حنصحح الأوضاع
الرجل الكبير - ( للطفل ) بقى أنت يا بتاع أنت تضربني وتجلدني ؟! ده أنا حاشرب من دمك
الممثل الشاب - (